У Мінску загінуў 20-гадовы кіроўца, які разам з незнаёмымі дзяўчатамі ўначы ўцякаў ад ДАІ. ВІДЭА пагоні
У ноч на 18 ліпеня ў цэнтры Мінска кіроўца «Опеля» ўрэзаўся ў асвятляльную мачту і загінуў. Ён уцякаў ад ДАІ.
Супрацоўнікі ДАІ заўважылі «Опель Амега С» а 3-й ночы, калі на праспекце Машэрава кіроўца праехаў пешаходны пераход на чырвонае. Парушальніка паспрабавалі дагнаць, але марна — ён збочыў у двары, яшчэ некалькі разоў праехаў на чырвонае, выехаў на сустрэчку… Адзначым, што пры гэтым не забываўся паказваць паваротнікі.
Пераслед скончыўся на вуліцы Даўгабродскай. «Опель» занесла, і машына ўрэзалася ў асвятляльную мачту. 21-гадовы кіроўца загінуў.
Яго пасажыры — 21-гадовы хлопец, а таксама тры дзяўчыны ўзростам 21 год, 18 гадоў і 17 гадоў, — шпіталізаваныя. Цяпер у бальніцы застаецца толькі адна з іх.
Са слоў пасажыраў, з кіроўцам яны былі знаёмыя некалькі гадзін, разам ужывалі алкаголь. Праводзіцца праверка.
