З'явіліся першыя фотаздымкі з хрэсьбінаў прынца Луі
Брытанская каралеўская сям'я апублікавала афіцыйныя фотаздымкі з хрышчэння прынца Луі, трэцяга дзіцяці герцага і герцагіні Кембрыджскіх, якое адбылося 9 ліпеня ў Лондане ў каралеўскай капліцы Сэнт-Джэймскага палаца.
Аўтар усіх здымкаў, зробленых адразу пасля хрышчэння, — вядомы фатограф Мэт Халіоўк.
«Была вельмі нязмушаная абстаноўка, усе былі ў выдатным настроі, працаваць было адно задавальненне», — сказаў Халіоўк.
Фотаздымкі былі зробленыя ў ранішнім пакоі і ў садзе Кларэнс-хаус — афіцыйнай рэзідэнцыі каралеўскай сям'і.
На хрышчэнні сям'я герцага і герцагіні Кембрыджскіх ўпершыню паўстала ў поўным складзе — з трыма дзецьмі.
Луі драмаў, калі яго прынеслі ў капліцу для цырымоніі, якая доўжылася 40 хвілін.
Герцагіня, як паведамляецца, сказала, што Луі паводзіў сябе вельмі спакойна і ціхамірна.
«Спадзяюся, такім ён і застанецца», — сказала яна ў жарт архібіскупу Кентэрберыйскаму Джасціну Уэлбі.
На афіцыйных фота апроч прынца Луі, яго брата прынца Джорджа, сястры прынцэсы Шарлоты і бацькоў таксама можна ўбачыць прынца Гары і яго жонку Меган, прынца Чарльза і яго жонку Камілу, а таксама сям'ю Мідлтан — бацькоў Кейт, брата Джэймса і сястру Піпу.
