Прэзідэнтам Мексікі стане «Чавес і Трамп у адной асобе»
Новым прэзідэнтам Мексікі абраны Андрэс Мануэль Лопес Абрадор, паведамляюць інфармагенцтвы. Лопес Абрадор — кандыдат ад левых сілаў з кааліцыі «Разам створым гісторыю».
Нацыянальны выбарчы інстытут апублікаваў дадзеныя так званага хуткага падліку галасоў. Лопес Абрадор набраў 53-53,8%, у яго бліжэйшага канкурэнта, прадстаўніка кааліцыі «Наперад, дзеля Мексікі» Рыкарда Аная - каля 22,1-22,8%.
Усе супернікі Лопеса Обрадора прызналі паразу.
Як паведамлялася, 1 ліпеня ў Мексіцы адбыліся ўсеагульныя выбары, на якіх грамадзянам трэба было абраць прэзідэнта і абнавіць склад парламента. Адначасова ў большасці рэгіёнаў прайшлі выбары ў мясцовыя органы ўлады.
Лопеса Абрадора называюць у Мексіцы «Amlo» (абрэвиятура з першых літар поўнага імя).
Праціўнікі крытыкавалі яго за левы папулізм і называлі «Чавесам і Трампам у адной асобе». Многія асцерагаюцца, каб ён не завёў Мексіку туды ж, куды завёў Венесуэлу нябожчык Уга Чавес. З Трампам яго параўноўваюць за нелюбоў да крытыкі ў прэсе. Адным з перадвыбарных абяцанняў Лопеса Абрадора было «прывесці ў прытомнасць» амерыканскага прэзідэнта, які абяцаў адгарадзіцца сцяной ад мексіканскіх імігрантаў.
