Алексін зоймецца тытунёвай вытворчасцю ў Шабанах. Для гэтага мяняюць межы Мінска
Для развіцця тытунёвай вытворчасці ў Шабанах дэпутаты Мінгарсавета прагаласавалі за змяненне межаў сталіцы, дакладвае БелТА. Як стала вядома TUT.BY, праект рэалізуе кампанія, падкантрольная бізнэсмену Аляксею Алексіну. Менавіта яму нядаўна ўлады краіны даверылі гандаль цыгарэтамі.
Участак плошчай 1,48 гектара, размешчанага на тэрыторыі прамысловай зоны Шабаны, прапануецца ўключыць у склад Мінскай вобласці і Мінскага раёна для рэалізацыі інвестыцыйнага праекта па развіцці тытунёвай галіны.
— Гэта прамысловая зона, жылыя будынкі на названай тэрыторыі адсутнічаюць, — сказаў старшыня камітэта архітэктуры і горадабудаўніцтва Мінгарвыканкама Павел Лучыновіч.
Меркаваны аб'ём інвестыцый складзе каля 100 мільёнаў рублёў. Будзе створана каля 200 працоўных месцаў.
Як распавялі TUT.BY дзве інфармаваныя крыніцы, інвестпраект рэалізуе падкантрольная бізнэсмену Аляксею Алексіну кампанія.
— Праект рэалізуецца ў рамках дасягнутых дамоўленасцей на ўзроўні кіраўніка дзяржавы ў канцы мінулага года. Для яго развіцця падрыхтаваны праект указа прэзідэнта, — кажа суразмоўца партала.
Крыніца, блізкая да Аляксея Алексіна, адмовілася ад каментароў.
Інтарэсы Аляксея Алексіна сканцэнтраваны на гандлі нафтапрадуктамі, банкаўскай сферы (МТБанк), вытворчасці мясных вырабаў («Вялес-мыт»), дэвелапменце, лагістыцы і рэстаранным бізнэсе. А ў канцы 2017 года ўлады даверылі яго кампаніі «Энерга-Оіл» стварэнне адзінай тавараправоднай сеткі, якая будзе прадаваць тытунёвую прадукцыю як на ўнутраным рынку, так і на знешнім. Нядаўна ж «Энерга-оіл» стала другім імпарцёрам цыгарэт (L&M, Parliament, Marlboro) у Беларусь. Раней толькі «Беларусьгандаль» Кіраўніцтва справаў прэзідэнта Беларусі меў права ўвозіць у краіну цыгарэты.
