У Мінску мужчына здаваў кроў па фіктыўных даведках з працы і атрымліваў за гэта грошы
У Мінску мужчына атрымліваў кампенсацыю за здачу крыві па фіктыўных даведках з працы, якія яму рабіла знаёмая. Цяпер абодвух вінавацяць у махлярстве ў буйным памеры. Падрабязнасці паведамляе прэс-служба Следчага камітэта.
41-гадовы мужчына з чэрвеня 2015 года па студзень 2018 года прыносіў у медыцынскую ўстанову фіктыўныя даведкі з працы. Наcамрэч ён нідзе не працаваў. Даведкі для яго рабіла знаёмая з арганізацыі, якую мужчына ўказваў у дакументах. У 2014 годзе прадпрыемства ліквідавалі, а ў знаёмай засталася пячатка. Подпісы бухгалтара і кіраўніка жанчына падрабляла сама.
З гэтымі фіктыўнымі даведкамі ва ўстанове аховы здароўя мужчыну больш за 30 разоў выплачвалі кампенсацыі ў памеры сярэднядзённага заробку за двое сутак адпачынку, звязаных з донарствам крыві. Акрамя таго, за яе здачу фігурант атрымліваў прыкладна па 100 рублёў. Так мужчына атрымаў за два з паловай гады 17 тысяч рублёў.
Мужчына змешчаны пад варту. Ён раней ужо прыцягваўся да крымінальнай адказнасці за махлярства. Ягоная знаёмая не судзімая, яна знаходзіцца пад падпіскай аб нявыездзе і належных паводзінах.