Пад Рагачовам на мужчыну напаў шалёны кот
Жыхар Старога Доўска адправіўся да калодзежа па ваду. Раптам ён адчуў, як нехта кусае яго за галёнку. Мужчына закрычаў, да яго на дапамогу падаспеў таварыш. Аказалася, што мужчыну ўкусіў кот, паведамляе slova.by. Вяскоўцы здагадаліся, што незвычайныя паводзіны жывёлы — прыкмета шаленства, забілі ката віламі і патэлефанавалі знаёмаму ветэрынару.
Спецыяліст распавёў, як трэба паступіць з мёртвай жывёлай. Мужчыны, не дакранаючыся да кацінага цела, паклалі яго спачатку ў адзін поліэтыленавы мяшок, потым у другі, спакавалі ў скрынку і адвезлі ў ветэрынарную лабараторыю. Экспертыза пацвердзіла шаленства. А пацярпелы тэрмінова звярнуўся па медыцынскую дапамогу.
Дарэчы, гаспадар ката не знойдзены, хутчэй за ўсё, жывёла была бяздомнай.
У ЗЦГіЭ нагадалі: калі не ўдалося пазбегнуць укусу — прамыйце рану вадой з мылам, апрацуйце яе сродкамі дэзінфікцыі (ёдам, спіртавым растворам) і звярніцеся ў любую ўстанову аховы здароўя па кваліфікаваную медыцынскую дапамогу.