У Мінску пройдзе бясплатная «Ноч дэгустацыі серыялаў»
У мультыплексе velcom cinema 11 мая ўпершыню пройдзе бясплатны паказ папулярных серыялаў. Гледачам таксама прапануюць тэматычныя закускі і бясплатныя напоі, настольныя гульні, навуковае шоу і віктарыны на веданне серыялаў. Арганізатарам кінамарафона выступіць лічбавае тэлебачанне VOKA.
Рэпертуар пакуль не раскрываюць, але вядома, што на вялікія экраны патрапяць 7 сучасных амерыканскіх серыялаў. Фармат «дэгустацыі» мяркуе прагляд па адным эпізодзе кожнага з іх.
На «Ноч дэгустацый серыялаў» можна трапіць толькі па папярэдняй рэгістрацыі. Пакінуць заяўку на ўдзел можна да 3 мая ўключна. На наступны дзень выпадковым чынам будзе разыграна 500 запрашальных.
«Ноч дэгустацыі серыялаў» у кінатэатры velcom cinema пачнецца 11 мая а 21:00 і працягнецца да самай раніцы. Апошні паказ павінен завяршыцца бліжэй да пачатку работы сталічнага метро (05:30), каб можна было свабодна дабрацца дадому.
