Time не ўключыў Пуціна ў спіс самых уплывовых людзей свету
Часопіс Time апублікаваў спіс 100 самых уплывовых людзей свету па стане на 2018 год. У яго ўпершыню за апошнія пяць гадоў не трапіў прэзідэнт Расіі Уладзімір Пуцін.
У новы спіс у катэгорыю «Лідары» ўвайшлі прэзідэнт ЗША Дональд Трамп, брытанскі прынц Гары і яго нявеста Меган Маркл, старшыня Дзяржаўнай рады КНДР Кім Чэн Ын, кіраўнік КНР Сі Цзіньпін, прэзідэнт Францыі Эмануэль Макрон, мэр Лондана Садзік Хан, прэм'ер-міністр Канады Джасцін Трудо, спецпрокурор ЗША, які расследуе меркаванае ўмяшанне Расіі ў выбары, Роберт Мюлер і іншыя.
Спіс традыцыйна дзеліцца на некалькі катэгорый. Акрамя «Лідараў» там ёсць аддзелы «Куміры», «Артысты», «Наватары», «Тытаны».
Пуцін уваходзіў у спіс самых уплывовых лідараў чатыры гады запар — з 2014 па 2017 год. Time уключаў яго ў гэты рэйтынг таксама ў 2002 і 2008 гадах.
