Трамп: У нас была вельмі жорсткая сутычка з расейцамі ў Сірыі. Шмат людзей загінула
Reuters.com
У канцы прэс-канферэнцыі з прэм'ер-міністрам Сіндза Абэ ў Фларыдзе, калі Дональд Трамп ўжо сабраўся сыходзіць, ён вырашыў распавесці, што думае пра ўзаемаадносіны з Расіяй.
Каментуючы рэпліку з залы наконт санкцый супраць Масквы, кіраўнік Белага дома заявіў, што «ЗША ўвядуць новыя санкцыі, калі яны іх сапраўды заслужаць»,
«Ніхто не паводзіў сябе так жорстка з Расіяй, як прэзідэнт Трамп. Гэта не журналісты пішуць. Спытайце ў Масквы. Вам там раскажуць, што больш жорсткага за мяне нікога не было», — заявіў кіраўнік Белага дома».
«У нас была вельмі жорсткая сутычка ў Сірыі. Месяц таму сутычка паміж амерыканскімі салдатамі і рускімі. Тады шмат людзей загінула, і гэта вельмі сумна», — заявіў Трамп.
Трамп не патлумачыў, што меў на ўвазе.
Напярэдадні памочнік дзяржсакратара ЗША Уэс Мітчэл даў паказанні міжнароднаму камітэту палаты прадстаўнікоў, у ходзе якіх заявіў пра «нядаўні напад расійскіх наймітаў, які праваліўся, на пазіцыі ЗША ў Сірыі».
У пачатку лютага адбыўся напад на пазіцыі Сірыйскіх дэмакратычных сіл, у якім удзельнічалі найміты з групы Вагнера. ЗША нанеслі, як паведамляецца, авіяўдар, у якім маглі загінуць да 200 чалавек.
