Дзіцячага футбольнага суддзю падазраюць у распаўсюдзе парнаграфіі
footbik.by
Следчы камітэт пацвердзіў затрыманне дзіцячага футбольнага арбітра і былога члена КДК і камітэта па этычных пытаннях АБФФ Юрыя Талкачова. Пра гэта заявіла афіцыйны прадстаўнік ведамства Марына Дранькова.
«Заведзена крымінальная справа ў дачыненні да 40-гадовага жыхара сталіцы па прыкметах злачынства, прадугледжанага ч. 2 арт. 343 (распаўсюд парнаграфічных матэрыялаў з выкарыстаннем Інтэрнэта) Крымінальнага кодэкса Беларусі. Ён затрыманы супрацоўнікамі органаў унутраных спраў 9 красавіка. Падазраваны змешчаны ў ізалятар часовага ўтрымання, з яго удзелам праводзяцца следчыя дзеянні», - распавялі ў СК.
Яму пагражае да 4 гадоў пазбаўлення волі.
Пра затрыманне Юрыя Талкачова стала вядома напярэдадні: людзі з аўтаматамі і ў масках выводзілі супрацоўніка АБФФ з будынка на праспекце Пераможцаў, 20/3.
Беларуская федэрацыя футбола пацвердзіла затрыманне, але адзначыла, што прычына затрымання не звязаная з выкананнем ім дагаворных абавязацельстваў перад АБФФ.
Юрый Талкачоў уваходзіў у склад КДК і камітэта па этычных пытаннях АБФФ, але быў выключаны з яго пасля скандальнай «справы Верамко».
