Эксперт сцвярджае, што раскрыў таямніцу будаўніцтва Стоўнхенджа
Даследаванне гісторыка Майка Пітса паказала, што два камені са старажытнага мегалітычнага збудавання Стоўнхендж, што ў Англіі, стаялі на тым месцы задоўга да таго, як людзі пачалі там сваю дзейнасць. Пра гэта пішаDaily Mail.
Фота: Вікіпедыя.
Навуковец сцвярджае, што першапачаткова два з найбуйнейшых валуноў комплексу былі выпадковым чынам размешчаныя так, што з пэўнага ракурсу сонца ў самы доўгі і кароткі дзень года заходзіць і садзіцца наўпрост паміж імі. Заўважыўшы такую асаблівасць, старажытныя людзі вырашылі стварыць на тым месцы вялікае збудаванне.
Стоўнхендж узводзіўся ў некалькі этапаў і цяперашні выгляд набыў каля 3,5 тысячы гадоў таму. Некаторыя з валуноў людзям даводзілася пераносіць за некалькі сотняў кіламетраў. Аб прызначэнні збудавання ходзяць розныя версіі: як мяркуецца, гэта магло быць нейкае сакральнае месца або абсерваторыя.
Майк Пітс займаецца вывучэннем старажытнае гісторыі брытанскіх земляў і ёсць адным з нешматлікіх навукоўцаў, што праводзяць раскопкі на тэрыторыі Стоўнхенджа.