Пад Шчучынам конь вёз п'янага гаспадара дадому, даішніку давялося ўзяць лейцы ў свае рукі ВІДЭА
У суботу каля 17.30 у адной з вёсак Шчучынскага раёна нарад ДПС убачыў вельмі дзіўную карціну: наперадзе па сярэдзіне дарогі рухаўся воз, а мужчына, які мусіў ім кіраваць, спаў.
Такі «самаходны» транспартны сродак, безумоўна, уяўляў небяспеку для дарожнага руху. Тады супрацоўнікі ДАІ вырашылі ўзяць сітуацыю пад кантроль — нарад апярэдзіў калёсы па ўзбочыне, адзін з інспектараў выйшаў з аўто і дагнаў калёсы, узяўшы аброць у свае рукі.
Было ясна, што мужчына моцна п'яны, патлумачыць што-небудзь не можа. Нічога не заставалася рабіць, як даць каню ісці далей пад кіраваннем супрацоўніка ДАІ. Бо конь заўсёды ведае шлях дадому.
Праз некаторы час на шляху сустрэліся мясцовыя жыхары, якія распавялі, дзе жыве возчык, а мужчына, які праязджаў на ровары, падахвоціўся дапамагчы і даставіць па месцы жыхарства.
