У Расіі хочуць дазволіць блакаваць сайты без рашэння суда
Расійскія судовыя прыставы могуць атрымаць права без суда блакаваць сайты з інфармацыяй, якая прызнана зняважлівай для якой-небудзь асобы. Законапраект з такой прапановай ужо ўнесены ў Дзярждуму — і эксперты асцерагаюцца, што ў выпадку яго прыняцця прыставы змогуць блакаваць без суда «Фэйсбук» і YouTube, піша BBC.
Дакумент распрацаваны групай дэпутатаў ад «Адзінай Расіі». Ён уносіць папраўкі ў законы, якія рэгулююць дзейнасць судовых прыставаў і распаўсюджванне і абарону інфармацыі, у тым ліку ў інтэрнэце.
У выпадку прыняцця законапраекта судовыя прыставы атрымаюць права выносіць пастановы аб блакаваннях сайтаў са звесткамі, якія зневажаюць, калі тыя, хто іх размясціў, не выдаляць іх у адведзены тэрмін (як правіла, пяць дзён са дня атрымання пастановы).
Звесткі прызнаюцца тымі, якія ганьбяць, судом. Аднак калі цяпер для блакавання сайта з такімі звесткамі трэба яшчэ адно, асобнае рашэнне суда, то новы законапраект прапануе даць судовым прыставам права самастойна дабівацца блакавання рэсурсу.
У тэксце законапраекта гаворыцца, што судовы прыстаў на працягу аднаго працоўнага дня павінен паведаміць пра сваё рашэнне Раскамнагляду, які і павінен заблакаваць старонку. Аўтары законапраекта — кіраўнікі думскага камітэта па бяспецы. Часцей за ўсё гэта азначае, што законапраект будзе прыняты.
Апісаны ў законапраекце механізм можа прывесці да блакавання не толькі сайтаў СМІ, але і такіх сервісаў як «Фэйсбук» і YouTube, адзначае вядучы юрыст праекта «Раскамсвабода», партнёр юрыдычнай кампаніі «Цэнтр лічбавых праў» Саркіс Дарбінян.