На галоўных праспектах Мінска перавышэнне па солях больш чым у 60 разоў — гінуць дрэвы
Нядаўнія аналізы паказалі перавышэнне па солях натрыю на пр. Пераможцаў у 66 разоў, а на пр. Незалежнасці — у 68 разоў. Такія дадзеныя, як перадае карэспандэнт агенцтва «Мінск-Навіны», прывяла журналістам кіраўнік службы па добраўпарадкаванні і ўтрыманні аб'ектаў гарадской гаспадаркі УП «Мінскзялёнбуд» Анжаліка Пузанкова.
Яна дадала, што ў канцы сакавіка азеляніцелі прыступілі да абследавання дрэў на прадмет жывых пупышак, праблем з паражэннем кары шкоднікамі. Гэтыя агляды паказалі, што на большасці дрэў, прылеглых да праезнай часткі вуліц, пупышкі спалены завіссю солі, якая асела на іх. У перыяд роспуску галіны з гэтымі пупышкамі прыйдзецца выдаляць і чакаць, калі прачнуцца новыя пупышкі і з'явіцца новая крона.
Канчаткова вызначыць стан дрэў пасля зімы можна будзе ў канцы красавіка. Тады стане зразумела, якія з іх захаваліся, а якія загінулі.
