Расія заявіла пра «шведскае паходжанне» яду «Навічок» — Швецыя выклікала расійскага пасла
Міністэрства замежных спраў Швецыі выклікала пасла Расіі з патрабаваннем растлумачыць заяву афіцыйнага прадстаўніка МЗС Расіі аб «шведскім» паходжанні рэчыва нервова-паралітычнага дзеяння Навічок.
«Пасол Расіі заўтра будзе выкліканы ў МЗС з-за абвінавачванняў Расіі ў тым, што Швецыя можа быць крыніцай атрутнага рэчыва, выкарыстанага пры замаху на забойства ў Солсберы», — паведамілі Reuters у МЗС Швецыі.
Міністр замежных спраў Швецыі Марго Вальстрэм назвала расійскія абвінавачванні «непрымальнымі і неабгрунтаванымі».
Прадстаўнік МЗС Расіі Марыя Захарава заявіла, што найбольш верагоднай крыніцай паходжання атрутнага рэчыва, з дапамогай якога атруцілі былога расійскага ваеннага разведчыка Сяргея Скрыпаля і яго дачку, з'яўляюцца тыя краіны, якія прыкладна з канца 90-х гадоў па цяперашні час праводзяць інтэнсіўныя даследаванні рэчываў з праекта «Навічок». Па яе версіі, гэтымі краінамі з'яўляюцца Вялікабрытанія, Славакія, Чэхія, Швецыя і, магчыма, ЗША.
