20 сакавіка адбудзецца «Спеўны Сход», прысвечаны песням і гімнам БНР
20 сакавіка ў культурніцкім цэнтры «Корпус» (пр. Машэрава, 9) адбудзецца «Спеўны Сход», тэмай якога будуць песні і гімны Беларускай Народнай Рэспублікі.
На сходзе плануецца спяваць ваяцкі марш «Мы выйдзем шчыльнымі радамі», «Пагоня», гімн сялянска-работніцкай грамады «Ад веку мы спалі ды нас разбудзілі» і іншыя творы 1917-1919 гадоў.
Спецыяльныя госці імпрэзы: музычная капэла «Санорус» і кампазітар Максім Іўкін.
«Уладзімір Тэраўскі, Мікола Равенскі і Мікола Куліковіч (Шчаглоў), музыка якіх прагучыць на «Спеўным сходзе», — знакавыя постаці айчыннай культуры, аўтары нашых нацыянальных гімнаў і стваральнікі нацыянальнага кірунку ў беларускай музыцы, — лічыць музыка і даследчык Максім Іўкін. — Іх лёсы склаліся няпроста. Уладзімір Тэраўскі быў расстраляны савецкімі ўладамі, а Равенскі і Куліковіч пайшлі ў вечны спачын на чужыне. Але іх культурная спадчына стала адным з зерняў, з якіх вырасла сучасная незалежная Беларусь».
Вядоўца — Сяржук Доўгушаў. Уваход вольны! Пачатак а 19-й.