Мінпрам плануе дасягнуць тысячы рублёў сярэдняга заробку ў першым паўгоддзі
Міністэрства прамысловасці плануе дасягнуць тысячы рублёў сярэдняга заробку у першым паўгоддзі 2018 года. Пра гэта заявіў сёння міністр прамысловасці Віталь Воўк у эфіры тэлеканала АНТ, паведамляе БЕЛТА.
«Мы плануем за шэсць месяцаў сярэдні заробак давесці да тысячы рублёў», - сказаў Віталь Воўк.
«Ёсць усе перадумовы, каб эканоміка расла, машынабудаванне рухалася. Лічу, што машынабудаванне — гэта лакаматыў руху наперад. Адно працоўнае месца ў аўтасельгазмашынабудаванні дае ад 7 да 12 працоўных месцаў у спадарожных галінах», — сказаў міністр.
Віталь Воўк адзначыў поспехі прадпрыемстваў. Так, БелАЗ стаў другім у свеце вытворцам цяжкіх кар'ерных самазвалаў. «Гэта 31% сусветнага рынку, гэта сур'ёзны поспех. Нарошчваючы аб'ёмы вытворчасці, за мінулы год БелАЗ прыцягнуў 900 новых працоўных месцаў», — сказаў міністр.
Паводле яго слоў, прадпрыемствы Міністэрства прамысловасці экспартуюць 75—80% прадукцыі.
