Мазырчука затрымалі за пастаўку гашышу з Масквы. Распачата пяць крымінальных спраў
Супрацоўнікі спецпадраздзялення пагранслужбы спынілі канал пастаўкі наркотыкаў з Расіі.
1 сакавіка аператыўнікі затрымалі двух беларусаў — распаўсюдніка забароненых прэпаратаў і яго пастаўшчыка, паведамілі ў прэс-службе Дзяржаўнага памежнага камітэта Беларусі.
У ходзе распрацоўкі канала наркатрафіку супрацоўнікам стала вядома, што адзін з жыхароў Мазыра даставіў наркотык з Масквы з мэтай продажу. Праваахоўнікі правялі агляд на месцах жыхарства і ў транспартных сродках падазраваных. У выніку выявілі поліэтыленавыя пакеты і скруткі з фальгі. У іх апынулася прыкладна 50 грамаў рэчыва расліннага паходжання карычневага колеру. Экспертыза ўстанавіла, што гэта гашыш.
У цяперашні час праводзяцца далейшыя аператыўна-вышуковыя мерапрыемствы для ўстанаўлення ўсіх удзельнікаў злачыннай дзейнасці. У дачыненні да распаўсюдніка і пастаўшчыка распачата пяць крымінальных спраў за незаконнае перамяшчэнне наркотыкаў праз мяжу, здзейсненае групай асоб па папярэдняй змове, а таксама за незаконныя з мэтай збыту, набыццё, захоўванне, перавозку наркатычных сродкаў, учыненыя групай асоб.
Дарэчы, у якасці пакарання за злачынства толькі па адным артыкуле — перасоўванне наркотыкаў праз дзяржмяжу — пагражае пазбаўленне волі да дзесяці гадоў з канфіскацыяй маёмасці.
