Пальчыс і Карпаў запусцілі каардынацыйны сайт кампаніі святкавання 100-годдзя БНР
У інтэрнэце з’явіўся новы сайт bnr100.by, на якім будуць змяшчацца ўсе навіны і падзеі, звязаныя з падрыхтоўкай і святкаваннем стагоддзя Беларускай Народнай Рэспублікі.
Над яго стварэннем працавала цэлая каманда з грамадскіх актывістаў, праграмістаў, тэсціроўшчыкаў і дызайнераў. Так, непасрэдны дызайн сайта распрацаваў публіцыст і дызайнер Стась Карпаў. Курыраваў працэс блогер Эдуард Пальчыс.
Сайт змяшчае адваротны адлік да святкавання 25 сакавіка, кропкі на мапе Беларусі са значнымі падзеямі ў гонар гэтага дня.
Стваральнікі адзначаюць, што пакуль што на сайце не даступныя некаторыя дробныя дэталі: напрыклад, не адлюстроўваюцца прэв’ю пры размяшчэнні спасылак у сацыяльных сетках ці мэсэнджарах. Але ўсё гэта — часовыя праблемы, запэўнівае ініцыятыўная група святкавання.
