У бальніцы хуткай дапамогі ў Мінску пасля падзення з каталкі памёр малады хлопец
27-гадовы хлопец памёр у пачатку лютага ў бальніцы хуткай медыцынскай дапамогі ў Мінску. За некалькі дзён да гэтага ў 4-й гарадской клінічнай бальніцы яму выканалі ЛОР-аперацыю. Аднак пасля перанесенага ўмяшання ў сувязі з ускладненнямі пацыента перавялі ў бальніцу хуткай дапамогі.
«Яго своечасова, у суправаджэнні доктара-анестэзіёлага даставілі ў БХМД для правядзення дадатковай дыягностыкі і кансультацыі. Разам з гэтым камісія адзначыла, што былі дапушчаныя парушэнні парадку знаходжання пацыента ў прыёмным аддзяленні БХМД», — адзначылі ў прэс-службе Мінздароўя.
Паводле інфармацыі сваякоў, апублікаванай на партале Onliner.by, хлопец, адыходзячы ад наркоза, зваліўся з каталкі. На ёй у парушэнне тэхнікі бяспекі былі апушчаныя борцікі.
Пакуль невядома, ці стала менавіта гэта траўма прычынай смерці.
Сітуацыя знаходзіцца на кантролі ў кіраўніцтва Мінздароўя, паведамляе БелТА.
«Была створана спецыяльная камісія. 21 лютага адбылося пасяджэнне лячэбна-кантрольнага савета, на якім дадзена ацэнка дзеянням і кампетэнцыі медыцынскіх работнікаў, якія прымалі ўдзел у лячэнні пацыента на ўсіх этапах. Была прааналізавана інфармацыя пра атрыманае маладым чалавекам ускладненне, што ўзнікла пасля праведзенага ў 4-й гарадской бальніцы хірургічнага ўмяшання», — сказалі ў прэс-службе.
