Праваслаўны манастыр у Талачыне «памяняўся» будынкамі з мясцовай міліцыяй: манастырскі коштам $500 тысяч на стары міліцэйскі
На партале Pravo.by з'явілася пастанова Савета міністраў №137 са спісам маёмасці, якую дзяржава прымае на свой баланс.
Адным з пунктаў там значыцца будынак у Талачыне, які знаходзіцца па вуліцы Трактарная 34А. Ён з уласнасці праваслаўнай царквы перайшоў пад аператыўнае кіраванне мясцовым Дэпартаментам аховы МУС.
Што гэта за будынак? Ён быў пабудаваны напрыканцы 2017 году і належаў Свята-Пакроўскаму жаночаму манастыру. Плошча будынка — 453,4 квадратных метры. Ён уключае ў сябе два паверхі, ёсць склеп, гараж і вальер.
Будынак коштам 500 тысяч даляраў паўстаў у рамках капітальнага рамонту манастыра, узвядзенне вялося за рахунак царквы і ахвяраванняў, вось як апісвала яго будаўніцтва адна з манашак для талачынскай мясцовай газеты:
Фота natal.by
«Калі дабудуем, убачыце ў ім і рысы праваслаўнага дойлідства. Гэта будучы дом для нашых гасцей, у ім будуць памяшканні для адпачынку і работы, правядзення сустрэч, семінараў, заняткаў. І пякарня, абавязкова. Дайце часу, накормім горад смачным манастырскім хлебам і салодкай здобай».
Чаму ж, маючы такія планы, манастыр раптам перадаў сваю ўласнасць міліцыі?
«Наша Ніва» спыталіся пра гэта ў настаяльніцы манастыра.
«Пакуль яшчэ нічога не перадаецца… Ну і што, што ўказ? Вось калі генералы прыедуць прымаць гэта ўсё, тады я змагу гаварыць, — сказала жанчына. — У сувязі з чым перадаем? Мы мяняемся будынкамі. Абмен раўназначны, я лічу», — дадала настаяльніца.
Імаверна, цяпер на баланс манастыра пяройдзе стары будынак, у якім месціўся Дэпартамент аховы — ён там недалёка, а міліцыянеры пераедуць у новы.
Плошча старога будынку — 219 квадратных метраў, разам з ім перадаецца і некалькі дадатковых службовых памяшканняў, таму агулам выходзіць прыкладна роўная плошча.
Як нам стала вядома, рашэнне аб абмене прымалася на ўзроўні міністра ўнутраных спраў Ігар Шуневіча і мітрапаліта Паўла, мясцовым міліцыянерам толькі давялі загад пераехаць.
Будынак Дэпартамента аховы МУС у Талачыне, фота vitebsk.ohrana.gov.by