У Мінску цяпер можна адсочваць з тэлефона, дзе едзе патрэбны транспарт
З 21 лютага сэрвіс «Яндэкс.Транспарт» стаў афіцыйна даступны ў беларускай сталіцы. Дзякуючы спецыяльным мабільным дадаткам для смартфона, можна ў рэжыме анлайн сачыць за рухам патрэбнага аўтобуса, тралейбуса або трамвая.
На мапе Мінска аўтобусы пазначаныя зялёным колерам, тралейбусы — сінім, трамваі — чырвоным. Пры націсканні на любы грамадскі транспарт паказваецца маршрут яго руху і час, праз які ён прыбудзе на кожны прыпынак.
Пры націсканні на прыпынак адлюстроўваецца пералік транспарту, які на ім прыпыняецца, а таксама час, праз які прыбудуць найбліжэйшыя транспартныя сродкі.
Прыпынкі і маршруты можна дадаваць у абранае, каб кожны раз не шукаць іх нанова.
Таксама можна пракласці рацыянальны маршрут: задаецца пачатковы і канцавы пункты, і праграма разлічвае найбліжэйшы шлях і час, які на яго трэба выдаткаваць. Калі чалавек баіцца прапусціць свой прыпынак, то можна паставіць у дадатку будзільнік, які нагадае, калі трэба выйсці.
Злева — спіс транспарту на канкрэтным прыпынку, справа — пракладзены маршрут
Мінск стаў дзясятым беларускім горадам, дзе пачаў працаваць «Яндэкс.Транспарт». Сэрвіс ужо некалькі год паспяхова працуе ў Баранавічах, Брэсце, Бабруйску, Пінску, Кобрыне, Гродне, Лідзе, Магілёве ды Слуцку, а таксама ў іншых буйных гарадах свету.
Беларускамоўнай версіі сэрвіс пакуль не мае. Спампаваць дадатак можна для прыладаў на Android і iOS.
«Мінсктранс» ужо меў падобны сэрвіс з назвай «Электроннае табло», які з'яўляецца мабільнай версіяй звычайных табло, што ўсталяваныя на некаторых прыпынках у Мінску.