Ярмошына распавяла, за каго прагаласавала датэрмінова
Фота Вадзіма Заміроўскага, 2016 год
У трэці дзень датэрміновага галасавання на выбарах у мясцовыя Саветы дэпутатаў кіраўнік ЦВК Лідзія Ярмошына прыйшла на свой выбарчы ўчастак, каб прагаласаваць. Лідзія Міхайлаўна прызналася, што выбрала таго кандыдата, які кінуў ёй улётку ў паштовую скрыню.
— Я выбрала таго, хто адзіны кінуў мне ўлётку ў паштовую скрыню, — сказала Ярмошына журналістам. — У прынцыпе, складана было вызначыцца, але з улікам і займанага становішча, і даходаў, і сямейнага становішча (яны ўсе сямейныя) я абрала менавіта гэтага кандыдата.
На ўчастку Лідзіі Ярмошынай балатавалася сем кандыдатаў, сярод якіх найлепшы хакеіст Беларусі — 2012 Віталь Коваль.
На пытанне журналістаў пра ідэальнага кандыдата, Ярмошына адзначыла, што такога няма
і галоўнае, каб чалавек быў добры.
Кіраўнік ЦВК таксама пракаментавала лічбы яўкі выбаршчыкаў на ўчасткі ў першыя дні датэрміновага галасавання. За два дні, паводле звестак ЦВК, яўка склала 11,06%.
— Мяркую, у гарадах бюджэтныя і навучальныя ўстановы стымулююць галасаваць. Гэта натуральны працэс, працуюць над яўкай, заклікаюць. Стымуляцыя — гэта заклікі і рэкамендацыі па месцы вучобы і працы. Таму менавіта цяпер дзяржаўная ўлада стымулюе. Але пагроз не павінна быць. Пагрозы — гэта калі прымушаюць ці кажуць, што калі ты не прыйдзеш, цябе выселяць з інтэрнату, ты не атрымаеш прэмію, мы падумаем, як ты будзеш здаваць экзамены і гэтак далей. Калі проста рэкамендуюць прыйсці і прагаласаваць за каго заўгодна, — гэта не больш, чым стымуляванне ў рамках закона.
