На выбарах у Смалявічах чыноўніца райвыканкама кінула выклік сваёй начальніцы. Але хутка зняла кандыдатуру
Цікавая карціна склалася на выбарах у мясцовыя саветы дэпутатаў у Смалявічах: на дэпутацкі мандат там прэтэндавалі два чалавекі, якія працуюць у адной дзяржструктуры.
З трох кандыдатаў па Пякалінскай акрузе №21 двое працуюць у райвыканкаме.
Адна з іх — намесніца старшыні Смалявіцкага раённага выканаўчага камітэта Наталля Якубіцкая. Другая — начальніца ўпраўлення па працы, занятасцi i сацыяльнай абароне таго ж райвыканкама Наталля Дзенісевіч.
Няўжо смалявіцкіх выбарцаў чакала б вайна чыноўніц на месца ў савеце дэпутатаў?
Наталля Якубіцкая (злева) і Наталля Дзенісевіч.
Як выявілася, інтрыга была нядоўгай. Наталля Дзенісевіч папрасіла зняць сваю кандыдатуру з дэпутацкай гонкі з цікавай фармулёўкай: «без уважлівых прычын».
На жаль, пакуль не атрымалася ўзяць каментарый у жанчын, каб зразумець, што за прычыны знішчылі інтрыгу ў Пякалінскай акрузе №21.
