Навукоўцы высветлілі раней невядомы небяспечны эфект парацэтамолу
Ужыванне лекаў на аснове парацэтамолу можа прывесці да парушэння рэпрадуктыўнае функцыі і праблемаў з развіццём дзіцяці ва ўлонні маці. Адпаведныя звесткі апублікаваныя ў часопісе EBioMedicine.
Навукоўцы правялі даследаванне, у якім узялі ўдзел 455 добраахвотнікаў, старэйшых за 18 гадоў, а таксама прааналізавалі архіўныя вынікі абследавання 1880 еўрапейскіх блізнятаў і 1235 людзей з афраамерыканскімі і іспанскімі каранямі.
Спецыялісты выявілі, што ва ўсіх пацыентаў, якія прымалі лекі на аснове парацэтамолу, назіралася знясіленне палавых гармонаў, эквівалентнае старэнню арганізма на гарманальным узроўні ажно на 35 гадоў!
Як адзначаецца ў артыкуле, такая клінічная карціна прыводзіць да дысфункцыі плацэнты і парушэння палавых функцый. Акрамя таго, прыём парацэтамолу падчас цяжарнасці павялічвае рызыку выкідка і ўзнікнення праблем, звязаных з развіццём нервовае сістэмы эмбрыёна.
Парацэтамол з'яўляецца шырока распаўсюджаным анальгетыкам, ім таксама збіваюць тэмпературу.
