Экс-гендырэктар Банкаўскага працэсінгавага цэнтра атрымаў шэсць гадоў калоніі ўзмоцненага рэжыму
9 лютага суд вынес прысуд былому генеральнаму дырэктару Банкаўскага працэсінгавага цэнтра, якога абвінавачвалі ў атрыманні хабару ў асабліва буйным памеры. Пра гэта паведаміла афіцыйны прадстаўнік Вярхоўнага суда Юлія Ляскова.
Генадзя Зубарава прызналі вінаватым «у прыняцці службовай асобай для сябе матэрыяльных каштоўнасцяў, выключна ў сувязі з займаным ім службовым становішчам, за спрыяльнае вырашэнне пытанняў, якія ўваходзяць у яго кампетэнцыю, выкананне ў інтарэсах таго, хто даў хабар, якіх-небудзь дзеянняў, якія гэта асоба магла здзейсніць з выкарыстаннем сваіх службовых паўнамоцтваў, учыненых паўторна, у асабліва буйным памеры». Яму прызначана пакаранне ў выглядзе пазбаўлення волі на тэрмін 5 гадоў з канфіскацыяй усёй маёмасці.
Ён таксама прызнаны вінаватым у завалоданні маёмасцю, учыненым службовай асобай з выкарыстаннем сваіх службовых паўнамоцтваў, у асабліва буйным памеры. Яму прызначана пакаранне ў выглядзе пазбаўлення волі тэрмінам на 5 гадоў 6 месяцаў з канфіскацыяй усёй маёмасці.
Па сукупнасці злачынстваў, шляхам частковага складання прызначаных пакаранняў Зубараў прысуджаны да пазбаўлення волі тэрмінам на 6 гадоў з канфіскацыяй усёй маёмасці, з пазбаўленнем права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, на тэрмін пяць гадоў з адбываннем пакарання ў папраўчай калоніі ва ўмовах ўзмоцненага рэжыму.
Суд таксама вынес прысуд другому фігуранту справы — грамадзяніну Латвіі. Ён прызнаны вінаватым у даванні хабару ў буйным памеры, яму прызначана пакаранне ў выглядзе пазбаўлення волі на тэрмін 2 гады з адбываннем пакарання ў папраўчай калоніі ва ўмовах ўзмоцненага рэжыму.
Прысуд у законную сілу не ўступіў і можа быць абскарджаны і апратэставаны ва ўстаноўленым законам парадку.
