У Беларусі з назвы расійскага фільма прыбралі згадкі пра Крым
Сёння ў пракат выйшла расійская камедыя «Жанчыны супраць мужчын: Крымскія вакацыі». Праўда, у Беларусі фільм атрымаў назву «Жанчыны супраць мужчын 2». Другой часткі аб «крымскіх вакацыях» няма як у афішах, так і ў назве стужкі, паведамляе Tut.by.
Пракатчыкам фільма ў Беларусі з'яўляецца УП «Кінавідэапракат». Першы намеснік генеральнага дырэктара Андрэй Разжавайкін растлумачыў, што дамова з праваўладальнікам у «Кінавідэапракату» заключана менавіта на фільм «Жанчыны супраць мужчын 2» (хоць гаворка і ідзе пра адзін і той самы фільм).
— Гэта назва прапісана ў нас у дагаворах, таму мы яе ўсюды выкарыстоўваем, — растлумачыў Разжавайкін. — Пад якім назовам фільм выходзіць на тэрыторыі Расіі, я не ведаю, не сачыў.
У кінакампаніі Fresh-Film, якая вырабіла фільм, распавядаюць, што прыстаўка «крымскія вакацыі» сапраўды ёсць у назве фільма. Аднак расійскі пракатчык ў рэкламных мэтах мог змяніць яго на «другая частка» або «частка два», каб глядач разумеў: гаворка ідзе пра працяг карціны «Жанчыны супраць мужчын», якая выйшла ў 2015 годзе.
Звязацца з расійскім пракатчыкам Tut.by не ўдалося.
