У Казахстане загарэўся аўтобус. Загінулі 52 чалавекі
У выніку ўзгарання аўтобуса ў Акцюбінскай вобласці Казахстана загінулі 52 чалавекі, паведамляе Камітэт па надзвычайных сітуацыях пры МУС рэспублікі.
ТАСС
«18 студзеня 2018 года ў 10:30 у Іргізскім раёне Акцюбінскай вобласці, на 1068 км аўтадарогі Самара — Шымкент, за 10 км ад пасёлка Калыбай, падчас руху адбылося загаранне пасажырскага аўтобуса маркі «Ікарус». У салоне знаходзіліся 55 пасажыраў і 2 кіроўцы. Грамадзянства ахвяр высвятляецца», — гаворыцца ў паведамленні ведамства.
Пяцярым пасажырам удалося выбрацца з аўтобуса. «Астатнія 52 чалавекі загінулі на месцы», — удакладнілі ў Камітэце па НС.
На месцы катастрофы працуюць падраздзяленні паліцыі, ратавальнікаў, медыкаў, псіхолагаў, там жа разгорнуты аператыўны штаб.
У аўтобусе знаходзіліся грамадзяне Узбекістана, аднак іх колькасць пакуль дакладна не ўстаноўлена.