Заведзеная крымінальная справа супраць уладальніка мінскага ўніверсама «Цэнтральны»
Следчы камітэт завёў крымінальную справу па падазрэнні ва ўхіленні ад выплаты падаткаў у дачыненні да кампаніі «НП-Сэрвіс» Івана Беразоўскага — паведамляе Tut.by са спасылкай на крыніцы, знаёмыя з сітуацыяй у кампаніі. Факт завядзення крымінальнай справы ў дачыненні да ўладальніка буйнога рытэйлера пацвердзілі і ў СК.
«Крымінальная справа заведзеная паводле ч.2 арт. 243 (Ухіленне ад выплаты падаткаў у асабліва буйным памеры) Крымінальнага кодэкса Беларусі. Па даручэнні следчых супрацоўнікамі ГУБАЗіК МУС у межах гэтай крымінальнай справы ў офісных памяшканнях кампаніі былі праведзены працэсуальныя дзеянні, гэта значыць ператрусы», — паведаміў афіцыйны прадстаўнік Следчага камітэта Беларусі Сяргей Кабаковіч.
«НП-Сэрвіс» займаецца дыстрыбуцыяй тавараў харчовай групы. Саўладальнік кампаніі, Іван Беразоўскі таксама кантралюе сетку з больш чым 50 харчовых крамаў «Хатні» і універсам «Цэнтральны» ў Мінску.
«У пятніцу ў кампаніі, буйнога дыстрыбутара, дзе працуе 2,5 тысячы чалавек, арыштавалі рахункі. Сума прэтэнзій, наколькі вядома, менш за 1 млн даляраў. Гэта мізэр для кампаніі, якая столькі падаткаў плаціць менш чым за месяц. Зразумела, што могуць быць падатковыя прэтэнзіі да кампаніі, але незразумела, навошта паралізоўвалі яе працу, ладзілі маскі-шоу. Тым больш калі ў мінулым годзе так гучна заявілі пра лібералізацыю і дэкрыміналізацыю ў дачыненні да бізнэсу», — пракаментаваў суразмоўца, знаёмы з сітуацыяй.
У Следчым камітэце ў сваю чаргу падкрэслілі, што са свайго боку прадпрымаюць усе магчымыя меры, з улікам следчай сітуацыі, для забеспячэння бесперабойнай працы і нармальнага функцыянавання суб'екта гаспадарання.
Сам Іван Беразоўскі паводле Tut.by знаходзіцца ў Лондане. Беразоўскі займае 61-ю пазіцыю ў топ-200 найболей уплывовых бізнэсоўцаў Беларусі паводле «Ежедневніка».
