Махляры прапаноўваюць укладчыкам вядомай піраміды за ўзнагароджанне вярнуць грошы
Праваахоўнікі папярэджваюць аб новай схеме махляроў. Аферысты прапануюць ахвярам вядомай піраміды пасрэдніцкія паслугі па вяртанні ўкладзеных грашовых сродкаў. Прапануюць «дапамагчы» за ўзнагароджанне, а атрымаўшы грошы, знікаюць.
Супрацоўнікі галоўнага ўпраўлення крымінальнага вышуку МУС мяркуюць, што для здзяйснення злачынстваў выкарыстоўваецца анкетная база дадзеных беларускіх грамадзян, якія ў 2011-2012 гадах ўклалі грошы ў вядомую расійскую фінансавую піраміду і да цяперашняга часу не атрымалі абяцаных выплат.
Схема дзеянняў зламыснікаў дастатковая простая. На мабільны тэлефон ахвяры паступае званок з нумара расійскага аператара.
Невядомы абанент паведамляе, што сітуацыя, у якой апынуўся ашуканы ўкладчык некалькі гадоў таму, яму пэўна вядомая. Як, зрэшты, і тое, што сума ўкладу з улікам працэнтных налічэнняў істотна ўзрасла. Маючы нібыта непасрэднае дачыненне да работы дадзенай фінансавай структуры, незнаёмы прапануе дапамогу ў атрыманні ўкладу. Для гэтага ад адрасата патрабуецца выслаць пэўную грашовую суму ў страхавы фонд арганізацыі.
- Атрымаўшы банкаўскі перавод, «пасярэднік» прапануе значна павялічыць суму вяртання ўкладу. Неабходнай умовай для гэтага з'яўляецца чарговы грашовы транш, - растлумачыў намеснік начальніка галоўнага ўпраўлення крымінальнага вышуку МУС Аляксей Малахаў. - Калі ў ўкладчыка ўзнікаюць сумневы ў шчырасці намераў «добразычліўца», на патрабаванні вярнуць высланыя ім зберажэнні ён атрымлівае адмову. Маўляў, вяртанне немагчыма, бо грашовыя сродкі цяпер знаходзяцца ў абароце фінансавай арганізацыі.
Пагадзіўшыся на ўмовы прадпрымальнага незнаёмца, жыхар Магілёва за два дні «перамоваў» адправіў на банкаўскі рахунак падстаўной асобы больш за 600 даляраў ЗША, а жыхарка Віцебскага рэгіёна за тры дні пазбавілася амаль 6 тысяч рублёў.
