Бацькі Вікі Папчэні, якая загінула на бульбе пад Маладзечнам, падалі пазоў на 50 тысяч аб спагнанні маральнай шкоды
У Маладзечне бацькі 13-гадовай вучаніцы СШ №11 Вікі Папчэні, якая загінула на бульбе ў верасні 2016 года, дамагаюцца ў судзе кампенсацыі маральнай шкоды. Сума пазову — 50 тысяч рублёў, піша kraj.by
Віка загінула 29 верасня 2016 года на бульбяным полі сельскагаспадарчага прадпрыемства «Усход-Агра» пасля таго, як на дзяўчынку заднім ходам наехаў грузавік МАЗ, які перавозіў бульбу.
У судзе Маладзечанскага раёна 26 і 27 снежня прайшлі два пасяджэнні паводле пазову Алега і Юліі Папчэня. Чарговае, трэцяе пасяджэнне, прызначанае на 17 студзеня.
— Мы падалі пазоў да аддзела адукацыі, спорту і турызму Маладзечанскага райвыканкама, ААТ «Хоўхлава», якому належаў МАЗ, які наехаў на маю дачку, і ААТ «Усход-Агра», на поле якога Віка загінула. Мы лічым гэтыя тры арганізацыі вінаватымі ў трагедыі. І просім суд вынесці рашэнне аб тым, каб яны сумарна пакрылі нам пазоў у памеры 50 тысяч рублёў, — патлумачыў Алег Папчэня.
Інтарэсы бацькоў дзяўчынкі прадстаўляе ў судзе прававы інспектар незалежнага прафсаюзу РЭП Юрый Белякоў. Ён распавёў, што ў першыя два пасяджэнні 26 і 27 снежня суд апытваў пазоўніка, адказчыкаў і трэціх асоб.
Юрый Белякоў адзначыў:
— Пазоўнік просіць спагнаць маральную шкоду толькі з аддзела адукацыі, спорту і турызму райвыканкама, а таксама сельгаспрадпрыемстваў «Усход-Агра» і «Хоўхлаў». Нягледзячы на гэта, суддзя Ігар Гарановіч прыцягвае да пакрыцця маральнай шкоды таксама СШ №11, дзе вучылася Віка, вадзіцеля Паўла Цыбіна, які кіраваў МАЗам, і настаўнікаў дзяўчынкі Ірыну Апанасевіч і Вольгу Завадскую, якія былі з Вікай ў той дзень на бульбе.
Нагадаем, Павел Цыбін асуджаны да 3 гадоў абмежавання волі з накіраваннем у выпраўленчую ўстанову адкрытага тыпу і пазбаўленнем права кіравання транспартнымі сродкамі на працягу пяці гадоў.
Прысуд Ірыне Апанасевіч і Вользе Завадскай — па два гады абмежавання волі без накіравання ў выпраўленчую ўстанову адкрытага тыпу і штраф у памеры 100 базавых велічынь кожнай (2 300 рублі). Таксама на працягу двух гадоў яны не маюць права займацца педагагічнай працай.
— Пасля таго, як суддзя прыцягнуў у якасці суадказніка школу, кіроўцу і настаўнікаў, мы, у сваю чаргу, падалі хадайніцтва аб прыцягненні да пакрыцця шкоды старшыні Маладзечанскага райвыканкама Аляксандра Яхнаўца, начальніка аддзела адукацыі, спорту і турызму райвыканкама Іну Драпеза і былога намесніка дырэктара СШ №11 Дзяніса Курца, якія адпраўлялі дзяцей на бульбу. А таксама кіраўніка і брыгадзіра ААТ «Усход-Агра», якія іх там прымалі, — сказаў прававы інспектар Юрый Белякоў.
