Паміж Гародняй і польскай Саколкай з’явіцца роварная траса
Вынікам транспамежнага супрацоўніцта паміж Гародняй і польскай Саколкай стане рамонт дзвюх камяніц ды пабудова роварнай трасы паміж гэтымі гарадамі. Як паведамляе радыё «Рацыя», на рэалізацыю праекта ў межах праграмы «PL-BY-UA 2014—2020» выдзелена амаль 2 мільёны еўра.
У Саколцы створаць, а ў Гародні адрамантуюць турыстычныя інфармацыйныя цэнтры. Як паведаміла бурмістарка Саколкі Ева Кулікоўска, даўжыня трасы складзе больш за 59 кіламетраў, будуць закупленыя ровары. На пачатковым этапе плануюць пакупку прынамсі 30 ровараў з польскага боку, а таксама 30 з беларускага боку. Будуць таксама электрычныя ровары, бо гэта даволі доўгая траса.
У межах праграмы «PL-BY-UA 2014—2020» таксама будуць рэалізаваныя транспамежныя праекты, сярод якіх байдарачны шлях, што злучыць Драгічын у Беларусі і Драгічын у Польшчы, пабудова культурных цэнтраў у польскім і беларускім Шчучынах. Рэалізацыі чакае каля 58 праектаў на суму каля 140 мільёнаў еўра.