У Латвіі перасталі лічыць ветэранамі Другой сусветнай супрацоўнікаў КДБ
Прэзідэнт Латвіі Раймонд Веёніс падпісаў закон аб статусе ўдзельніка Другой сусветнай вайны, які не дазваляе прызнаваць ветэранамі супрацоўнікаў КДБ СССР і КДБ Латвіі. Пра гэта паведамляе партал Delfi.
У снежні 2017 года латвійскі парламент Сейм у канчатковым чытанні прыняў закон аб прысваенні статусу ветэрана Другой сусветнай вайны грамадзянам Латвіі, якія ваявалі як супраць нацысцкай Германіі, так і супраць СССР. На не грамадзян закон не распаўсюджваецца.
Статус ветэрана пазбаўляюцца ўдзельнікі Другой сусветнай вайны, якія былі супрацоўнікамі КДБ СССР і КДБ Латвійскай Савецкай Сацыялістычнай Рэспублікі. Выключэнне будзе зроблена толькі для супрацоўнікаў фінансавых і адміністрацыйна-гаспадарчых структурных падраздзяленняў гэтых ведамстваў.
Статус удзельнікаў вайны таксама не атрымаюць члены Нацыянал-сацыялістычнай партыі Германіі і яе ваенізаваных структур, тайнай паліцыі і службаў бяспекі Трэцяга рэйха, а таксама асобы, асуджаныя за злачынствы супраць чалавецтва і аналагічныя злачынствы. Акрамя таго, у законе сказана, што Латвія не нясе адказнасці за «дзеянні акупацыйных сіл» і як акупаваная дзяржава не прымала ўдзел у ваенных дзеяннях падчас Другой сусветнай вайны.
Закон быў прапанаваны камісіяй Сейма па правах чалавека і грамадскіх справах. Мэтай закона яго аўтары паставілі прызнанне і ацэнку заслуг грамадзян Латвіі, якія падчас вайны знаходзіліся ў складзе рэгулярных вайсковых частак іншых дзяржаў і ўдзельнічалі ў барацьбе супраць узброеных фармаваньняў СССР, нацысцкай Германіі ці яе саюзнікаў.
