Вайсковы бюджэт Украіны сёлета ўзрасце амаль на 20%
Сёлета вайсковы бюджэт Украіны складзе рэкордныя $3,1 мільярда. Пра гэта на сваёй старонцы ў фэйсбуку паведаміў прэзідэнт Украіны Пятро Парашэнка.
«Наш галоўны саюзнік — гэта ўкраінскія ўзброеныя сілы. Моцная і магутная, адна з найэфектыўнейшых армій у Еўропе», — напісаў Парашэнка.
Плануецца, што на фінансаванне арміі Украіна будзе выдаткоўваць суму, эквівалентную 2,58% ад ВУП.
Для параўнання: згодна з бюджэтам Беларусі на 2018 год, выдаткі на нацыянальную абарону будуць складаць каля $576 мільёнаў. Гэта каля 1,3% ад ВУП краіны.
У 2017 годзе бюджэт Міністэрства абароны Украіны складаў каля $2,6 мільярда.
Такім чынам, вайсковы бюджэт Украіны ў даляравым эквіваленце ўзрасце амаль на 20%.
Вайсковы бюджэт Украіны пачаў імкліва павялічвацца з пачаткам баявых дзеянняў на Данбасе. На 2014 год Украіна планавала выдаткаваць на бяспеку і абарону ўсяго $1,8 мільярда. На той момант гэта складала ўсяго 1,3% ад ВУП.
