«Багач Алік» падмануў даверлівую мінчанку на 52 тысячы рублёў
У Маскоўскі РУУС Мінска звярнулася жанчына з заявай аб тым, што мужчына пад псеўданімам «Багач Алік» падманам і карыстаючыся даверам завалодаў ейнымі грашыма на 52 тысячы рублёў, піша guvd.gov.by
Жанчына расказала, што ў чэрвені ў інтэрнэце яна пазнаёмілася з мужчынам пад нікам «Багач Алік». У ходзе перапіскі Багач Алік прапанаваў мінчанцы інвеставаць грашовыя сродкі ў прыбытковы бізнэс.
Мужчына і жанчына сустрэліся, абмеркавалі ўсе нюансы здзелкі і ў той жа дзень аформілі на імя грамадзянкі шэсць крэдытаў у розных банках на 52 000 рублёў. Уся сума была перададзена новаму знаёмаму. Першы час ён спраўна плаціў унёскі па крэдытах, аднак неўзабаве заяўніцы сталі паступаць тэлефанаванні з банкаў з просьбай пагасіць запазычанасці па крэдытах, і яна звярнулася ў міліцыю.
У аператыўнікаў ёсць інфармацыя аб тым, што ад злачынных дзеянняў пацярпелі і іншыя людзі.