У Беларусі ствараюць клоны дубоў-доўгажыхароў
У Беларусі могуць з'явіцца плантацыі шматгадовых дрэваў-клонаў. Пра гэта карэспандэнту БелТА паведаміў загадчык аддзела інфармацыйнага забеспячэння і інавацыйнай дзейнасці Інстытута лесу НАН Беларусі Андрэй Навойчык падчас працы секцыі «Сучасныя біятэхналогіі» на II з'ездзе вучоных Беларусі.
Над тэхналогіяй кланавання ўнікальных шматгадовых дрэў навукоўцы працуюць ужо некалькі гадоў. Значнасць гэтай працы складаецца ў захаванні і выкарыстанні каштоўнага генафонду такіх дрэў для лесааднаўлення і лесаразвядзення. Клоны дрэваў-доўгажыхароў могуць таксама рэалізоўвацца ў якасці сувенірнай прадукцыі.
Андрэй Навойчык падзяліўся тэхналогіяй кланавання дрэў: «З пупышкі бяруцца клеткі, якія перамяшчаюцца ў спецыяльнае пажыўнае асяроддзе і праз пэўную колькасць часу вырастае клон, які паўтарае ўласцівасці мацярынскага дрэва. Што тычыцца шматгадовых дрэў, то пакуль працуем толькі з дубамі. Плантацыі гэтых дрэваў-клонаў у будучыні могуць з'явіцца ў любой вобласці краіны».
