Палова аўтамабіляў у Беларусі ездзіць без тэхагляду
1,2 мільёна аўтамабіляў — а гэта амаль палова ад агульнай колькасці зарэгістраваных у Беларусі — своечасова не прайшлі тэхагляд.
Такія звесткі прывёў у эфіры праграмы «Галоўны эфір» на БТ намеснік начальніка УП «Белтэхагляд» Уладзімір Півульскі. Вялікая таксама доля тых, хто не праходзіць дыягностыку і не атрымлівае допуск да руху з першага разу: і палова з іх — з-за няспраўнасцяў тармазной сістэмы, піша Tut.by.
Гаворка ў праграме ішла пра аварыю ў Мінску 2 снежня, калі на ажыўленым участку праспекта Пераможцаў, каля гандлёвага цэнтра «Замак», групу пешаходаў, якія ішлі на зялёны, пратараніў грузавы аўтамабіль ЗІЛ. 11-гадовая дзяўчынка загінула на месцы, чатыры чалавекі патрапілі ў бальніцу. Па словах кіроўцы, у грузавіка не спрацавалі тармазы. Пазней стала вядома, што «ЗіЛ» з 2015 года не праходзіў дзяржтэхагляд.
