Ярабік заявіў, што «Гавары праўду» ў 2010 годзе фінансавалі з Польшчы і Расіі, Дзмітрыеў не каментуе
Былы кіраўнік беларускага офіса амерыканскай арганізацыі па дапамозе развіццю PACT Балаж Ярабік даў вялікае інтэрв’ю сайту rfrm.io. Ярабіка, які ў свой час укладваўся ў беларускую апазіцыю, быў нават неўязны ў нашу краіну, некаторыя цяпер лічаць ледзь не лабістам беларускай улады на Захадзе.
Андрэй Саннікаў і Уладзімір Някляеў, 2010 год. Фота euraradio.fm.
У гутарцы былы супрацоўнік фонду расказвае пра фінансаванне апазіцыі. Rfrm.io дала гутарцы загаловак, што некаторыя апазіцыянеры атрымлівалі грошы не толькі з Польшчы, але і з Расіі адначасова.
Ярабік — венгр, грамадзянін Славаччыны, ад канца мінулага стагоддзя працаваў над праектамі падтрымкі беларускай грамадзянскай супольнасці. Кажа, што спрабаваў перадаць ім славацкі досвед дэмакратычных пераўтварэнняў. PACT — найбуйнейшы донарскі фонд, што дзейнічаў у рэгіёне, фінансаваўся Агенцтвам ЗША па міжнародным развіцці (USAID).
«Аказалася, для беларускіх уладаў яшчэ большым шокам стала тое, што яны ўпершыню раскрылі новыя механізмы фінансавання апазіцыі. У 2010 годзе, як і падчас выбараў 2004 года, у Беларусь накіравалі грошы новыя донары, расійскія.
Адны і тыя ж апазіцыйныя структуры адначасова фінансавалі донары і з Польшчы, і з Расіі», — кажа Ярабік.
Каго мае на ўвазе Ярабік? «Нууу … (смяецца). Розныя праекты, якія былі самымі актыўнымі».
«Магчыма, гэта не былі грошы Крамля, але ёсць чуткі, якія кажуць пра адваротнае», — кажа Ярабік. Эксперт называе лічбу 3—4 мільёны даляраў, якую апазіцыя выкарыстала на прэзідэнцкую кампанію 2010. Маўляў, такую лічбу далі ягоныя падлікі розніцы між коштам кампаніі і сумамі, атрыманымі ёю ад заходніх донараў.
Найбольшыя фінансавыя рэсурсы на прэзідэнцкіх выбарах — 2010 мела кампанія «Гавары праўду», якая выстаўляла кандыдадатам Уладзіміра Някляева. Ужо на той час многія казалі пра сувязі «Гавары праўду» з Масквой. Аднак ніякіх доказаў ні тады, ні цяпер, што кампанія Някляева атрымлівала сродкі з Усходу няма.
Мы спыталіся ў тагачасных лідараў «Гавары праўду», што яны могуць адказаць на словы Ярабіка.
«Не хачу звязвацца з гэтым чалавекам, я даўно забыўся на яго. Ягоныя словы ніяк не падмацаваныя.
Ён [Ярабік] цяпер знаходзіцца на баку тых, хто парушае правы чалавека ў Беларусі. У ягоную задачу ўваходзіць тое, каб беларускія ўлады выглядалі больш прывабна, а праціўнікі — у негатыўным святле, — сказаў «Нашай Ніве» Някляеў.
— Не першы раз ён кажа нешта падобнае. Гэта фігура мне цалкам зразумелая», — сказаў Някляеў.
Потым ён дадаў: «Ніводнай капейчыны з Расіі мы не мелі. Магу гэта засведчыць і чалавечым, і на божым судзе».
Андрэй Дзмітрыеў сказаў: «Я не каментую чужыя чуткі, дадумкі і фантазіі». Падобную пазіцыю мае і Аляксандр Фядута, які лічыць, што каментаваць няма чаго, бо Ярабік так і не агучыў ніводнага факта і ніводнага прозвішча.
