«Ехаў у краму па выпіўку». Судзяць п'янага бяспраўніка, які на пешаходным пераходзе насмерць збіў жанчыну з дзіцём на руках
У судзе Партызанскага раёна Мінска разглядаюць справу аб гучным ДТЗ. Мужчына без правоў насмерць збіў на пешаходным пераходзе маладую жанчыну з дзіцём.
Аварыя адбылася ў пачатку мая на вуліцы Солтыса ў Мінску. БМВ ехаў з боку вуліцы Ваўпшасава ў напрамку вуліцы Пераходнай.
Перад пешаходным пераходам машыну занесла і развярнула. У выніку аўтамабіль збіў на пераходзе 33-гадовую жанчыну, у якой на руках была 3-гадовая дачка, а потым урэзаўся ў тралейбус. Жанчына загінула на месцы здарэння, дзіця на хуткай павезлі ў бальніцу. Акрамя гэтага, тры пасажыры ў BMW атрымалі траўмы рознай ступені цяжкасці. Сам кіроўца быў п’яны. Акрамя таго, правоў кіравання аўтамабілем ён не меў і ніколі іх не атрымліваў.
Цяпер той самы кіроўца на лаве падсудных. Яго завуць Ігар Сокал, яму 30 гадоў. Сокал родам з Пінска, але жыў у Мінску. Быў разведзены, нідзе не працаваў.
Раней Сокал ужо меў судзімасці: у 2008 годзе ён атрымаў 7 гадоў пазбаўлення волі за згвалтаванне. У 2015 — паўгода пазбаўлення волі за парушэнне правілаў прэвентыўнага нагляду.
Цяпер Сокала судзяць за п’янае ДТЗ, якое пацягнула смерць чалавека. Яму пагражае да 7 гадоў пазбаўлення волі.
Віну сваю Сокал прызнаў часткова.
«Я быў за стырном, і машына аказалася ў заносе, я збіў чалавека. Але здзейсніў не ўсе пералічаныя пракурорам парушэнні ПДР», — сказаў Ігар Сокал.
На судзе Сокал адмовіўся даваць паказанні.
Пацярпелы — муж загінулай жанчыны — папрасіў суд спагнаць з Сокала кампенсацыю за маральную шкоду — 30 тысяч на сваю карысць, 40 тысяч — дачцэ. І яшчэ 200 рублёў за паслугі юрыста.
У машыне ў тую ноч быў сам Ігар Сокал, яго сябар і бацька сябра.
Пра падрабязнасці распавёў бацька сябра. Кампанія ехала ў краму па алкаголь. Сам мужчына «выпіваў цягам дня», ці піў Сокал — невядома, сцвярджае сведка, але нібыта той выглядаў цвярозым.
Пасля ДТЗ мужчыну выкінула праз разбітае шкло машыны на багажнік, пасля ён вылецеў на газон. Зламаў рэбры, хрыбет, кажа, у прытомнасць прыйшоў на дзясятыя суткі. Але прэтэнзій да Сокала не мае.
«Як пакараць яго? Як вырашыць суд», — сказаў сведка.