У Нью-Ёрку прадалі самую дарагую карціну ў свеце. Гэта проста рэкордныя грошы
Яе кошт у два разы большы, чым кошт самага дарагога футбаліста ў свеце — Неймара
AP
У ходзе таргоў на аўкцыёне Christie's карціна Леанарда да Вінчы «Збаўца свету» падаражэла ў чатыры разы і была прададзеная за $ 450,3 млн. Палатно належала расійскаму мільярдэру Дзмітрыю Рыбалоўлаву, ён купіў яго за 127 мільёнаў.
Карціна Леанарда да Вінчы на таргах на аўкцыёне Christie's была прададзеная за рэкордную суму. Пакупнік прапанаваў за яе $400 млн, агульны кошт палатна склаў $450,3 млн, гаворыцца ў паведамленні на сайце аўкцыённага дома.
Таргі доўжыліся паўгадзіны, стартавы кошт карціны быў у чатыры разы ніжэйшы — $ 100 млн.
Адзіная вядомая карціна да Вінчы, якая знаходзіцца ў прыватнай уласнасці, стала самай дарагой, з калі-небудзь прадаваных на аўкцыёнах.
Да гэтай угоды самай дарагой карцінай, прададзенай у ходзе публічных таргоў, была праца Пабла Пікаса «Алжырскія жанчыны» (1955). Яна пайшла з малатка ў траўні 2015 года за $179,4 млн. У лістападзе таго ж года на таргах Christie's за $ 170,4 млн была прададзеная карціна італьянскага мастака і скульптара Амедэа Мадыльяні «Аголеная, што ляжыць».
