Затрыманы тата Ксеніі Сітнік, адзін з кіраўнікоў будаўнічай кампаніі «ІмабіленІнвест»
Затрыманы Міхаіл Сітнік — адзін з кіраўнікоў кампаніі «ІмабіленІнвест», якая будавала ФАК на скрыжаванні сталічных вуліц Рафіева і Бялецкага ў Малінаўцы. Пра гэта TUT.BY распавялі некалькі не звязаных паміж сабой крыніц. А ў ДФР КДК паведамілі падрабязнасці крымінальнай справы ў дачыненні да службовых асобаў «ІмабіленІнвест».
Па словах суразмоўцаў, на мінулым тыдні праваахоўнікі затрымалі Міхаіла Сітніка. Ён з'яўляецца адным з кіраўнікоў кампаніі «ІмабіленІнвест», але больш вядомы як бацька пераможцы дзіцячага «Еўрабачання» 2005 года Ксеніі Сітнік. У кастрычніку пісалі, што на яго з-за двайных продажаў памяшканняў пакрыўдзіліся партнёры па будаўніцтве спартыўна-аздараўленчага комплексу ў Малінаўцы.
Адзін мабільнік Сітніка зараз недаступны, другі — не адказвае. Недаступны таксама і тэлефон Таццяны Троцкай — яго кампаньёна па кампаніі «ІмабіленІнвест».
Намеснік начальніка аддзела Дэпартамента фінансавых расследаванняў Камітэта дзяржкантролю Юрый Кардымон распавёў, што дэпартаментам выяўлены факты крадзяжоў шляхам злоўжывання службовымі паўнамоцтвамі службовымі асобамі ТАА «ІмабіленІнвест» пры будаўніцтве і рэалізацыі нежылых памяшканняў у складзе фізкультурна-аздараўленчага комплексу, які будуецца на скрыжаванні вуліц Рафіева — Бялецкага ў Мінску.
— Разам з тым праведзеная фінансавай міліцыяй праверка паказала, што службовымі асобамі ТАА «ІмабіленІнвест» адны і тыя ж нежылыя памяшканні фактычна прадаваліся па некалькі разоў розным асобам. Усяго ТАА «ІмабіленІнвест» было заключана дагавораў на рэалізацыю нежылых памяшканняў ФАКа агульнай плошчай 7,3 тысячы квадратных метраў пры тым, што яго праектная плошча склала не больш за 5 тысяч квадратных метраў.
Дэпартаментам распачатыя крымінальныя справы па частцы 4 артыкула 210 (Крадзеж шляхам злоўжывання службовымі паўнамоцтвамі) КК РБ. Шкода па іх склала каля 900 тысяч рублёў (450 тысяч даляраў). Гэта тыя грошы, якія кампанія атрымала за паўторную рэалізацыю памяшканняў ФАКа.
— Падазраванымі па крымінальных справах прызнана два чалавекі, якія з'яўляліся службовымі асобамі ТАА «ІмабіленІнвест». У дачыненні да аднаго з іх прыменена мера стрымання ў выглядзе заключэння пад варту.
Зараз па ўказаных фактах праводзяцца неабходныя следчыя дзеянні і аператыўна-вышуковыя мерапрыемствы, накіраваныя на выяўленне і дакументаванне іншых эпізодаў супрацьпраўнай дзейнасці падазраваных.
