Міхаіла Задорнава пахаваюць у Латвіі
Развітанне з пісьменнікам-сатырыкам Міхаілам Задорнавым у Маскве па просьбе сваякоў праходзіць у закрытым рэжыме, паведамляюць інфармагенцтвы.
У цырымоніі развітання, якая праходзіць у клініцы, дзе памёр сатырык, бяруць удзел толькі блізкія сябры і сваякі. Затым цела, згодна з апошняй воляй Міхаіла Задорнава, будзе дастаўлена ў Латвію, дзе яго пахаваюць побач з бацькам.
У паведамленні сям'і сатырыка, размешчаным на яго афіцыйнай старонцы ва «Укантакце», гаворыцца, што родныя не давалі згоды на публічныя абмеркаванні яго жыцця і смерці ў розных ток-шоу і іншых тэлевізійных перадачах, у друкаваных СМІ і на радыё.
Таксама паведамляецца, што Міхаіл Задорнаў заўсёды ахоўваў сваё жыццё і жыццё родных ад старонняга ўмяшання. У сувязі з гэтым просяць праяўляць павагу да яго жадання і не ствараць мітусні вакол яго смерці.
Расійскі сатырык Міхаіл Задорнаў памёр 10 лістапада ад анкалогіі. Яму было 68 гадоў.