Да 5 000 гадоў: якія дрэвы жывуць даўжэй за ўсіх? ФОТЫ
Мы ўжо распавядалі пра жывёл-рэкардсменаў, якія перажываюць чалавека на некалькі сотняў год. Але нават жыццё грэнландскай палярнай акулы працягласцю 500 год — нішто ў параўнанні з некаторымі раслінамі.
Перажыла свой росквіт і заняпад старажытная егіпецкая цывілізацыя, нарадзіўся Хрыстос, утварылася першая беларуская дзяржава — Полацкае княства, была адкрыта электрычнасць, мінула Другая сусветная вайна, а некаторыя з гэтых дрэваў прайшлі праз тысячагоддзі і дагэтуль стаяць, застаючыся адзінымі сведкамі ўсіх падзей, што адбываліся на нашай планеце.
У гэтым артыкуле мы распавядзем пра дрэвы, працягласць жыцця якіх здольная ўразіць кожнага.
1. Мафусаіл — 4847 гадоў
Так называецца асцюкаватая міжгорная сасна, самае старое з вядомых жывых дрэваў, якое расце ў амерыканскай Каліфорніі. У 2012 годзе была знойдзеная іншая такая сасна, чый узрост яшчэ большы — да 5000 год. У Швецыі, дарэчы, расце звычайная елка, узрост якой ацэньваюць у 9550 год. Але насамрэч яна мае ўзрост толькі некалькі стагоддзяў і з'яўляецца вегетатыўным нашчадкам, што расце над памерлай елкай.
2. Секвоядэндран — 3500 гадоў
Для вечназялёных іглічных дрэваў секвоядэндран сямейства кіпарысавыя жыць па тры-чатыры тысячы год — звычайная справа. Шматлікія экзэмпляры маюць нават свае ўласныя імёны.
Цяпер гэтых велізарных раслін засталося не так і шмат. У прыродзе яны сустракаюцца ў Каліфорніі, культывуюцца таксама ў Еўропе.
3. Джая Шры Маха Бодхі — 2300 гадоў
Дрэва ў Шры-Ланцы, якое, паводле падання, было вырашчанае з адростка Дрэва Бодхі, пад якім прынц Гаўтама дасягнуў прасвятлення і стаў Будам. Гэтае дрэва таксама лічыцца самым старым у свеце дрэвам, пасаджаным чалавекам.
4. Ядловец Бенета — 2200 гадоў
Яшчэ адзін доўгажыхар з Каліфорніі — заходні ядловец — адносіцца да сямейства Кіпарысавых, для якіх, як ужо згадвалася вышэй, доўгажыхарства — правіла, а не выключэнне.
5. Дуб у Беларусі — 800 гадоў
Цар-дуб — у цэнтры. Фота: fotobel.by
Самым старым дрэвам у Беларусі лічыцца Цар-дуб, які расце ў Маларыцкім раёне Брэсцкай вобласці. Ягоны ўзрост навукоўцы ацэньваюць у 800 гадоў, і, варта адзначыць, выглядае ён яшчэ даволі бадзёра.