1 лістапада — вялікая імпрэза «Дзеяслова»: будуць Арлоў, Хадановіч, Жыбуль, Дубавец, іграе «Крама»
У менскім клубе «Грай» (Інтэрнацыянальная, 33) вядомы незалежны літаратурны часопіс Беларусі адсвяткуе сваё 15-годдзе. Чакаецца сапраўдны фестываль літаратуры і музыкі.
Роўна 15 год таму, пасля разгону ўладамі рэдакцый літаратурных выданняў і аб'яднання іх у мінінфармаўскі холдынг, Саюз пісьменнікаў заснаваў свой, незалежны літаратурны часопіс «Дзеяслоў». Прынцыпова толькі ў ім сталі друкавацца Янка Брыль, Рыгор Барадулін, Ніл Гілевіч, Генадзь Бураўкін. Тут жа публікавалася пасмяротная спадчына Васіля Быкава — аповесці «Афганец» і «Бліндаж», апавяданне «Бутэльчына, альбо Прэзідэнт на дрэве», дзённік Уладзіміра Караткевіча.
Сёння «Дзеяслоў» — тая незалежная пляцоўка, дзе кожны можа пазнаёміцца з найлепшымі мастацкімі творамі сучаснай беларускай літаратуры, крытыкай, перакладамі і нон-фікшн (непрыдуманай літаратурай).
Дастаткова сказаць, што ўсе без выключэння лаўрэаты Прэміі Гедройца — сталыя аўтары часопіса.
1 лістапада ў клубе «Грай» часопіс павіншуюць Валянціна Аксак, Уладзімер Арлоў, Ігар Бабкоў, Леанід Галубовіч, Вольга Гапеева, Леанід Дранько-Майсюк, Сяргей Дубавец, Віктар Жыбуль, Наста Кудасава, Валярына Кустава, Людміла Рублеўская, Віталь Рыжкоў, Міхась Скобла, Андрэй Хадановіч, Віктар Шалкевіч.
У праграме — жывая музыка ад гуртоў «Рэха», «Bar Akaryna», а таксама легендарнай «КРАМЫ»!
Пачатак а 18.30.
Уваход вольны.
