Над Еўропай гаспадарыць ураган «Герварт»: над Беларуссю — моцны вецер, абвешчаны аранжавы ўзровень небяспекі
Reuters.com
Белгідрамет абвясціў аранжавы ўзровень небяспекі на панядзелак і аўторак. Так сёння парывы ветру ў большасці рэгіёнаў краіны могуць дасягаць 15—22 м/с, а ў некаторых раёнах да 24 м/с.
Сёння па ўсёй тэрыторыі краіны чакаюцца дажджы, у тым ліку ў Мінску, увечары мокры снег. Вецер паўночна-заходні, максімальная тэмпература паветра — +3—5 градусаў.
Ураган «Герварт» (палякі яго назвалі «Гжэгаж») ужо пагаспадарыў над Германіяй, Чэхіяй і Польшчай, што прывяло да спынення руху транспарту, паваленых дрэваў, некалькі чалавек загінулі.
У Нямеччыне 63-гадовы мужчына патануў падчас штармавога прыліву ў бухце на Паўночным моры, а яшчэ адна жанчына памерла ў бальніцы, куды яе даставілі пасля таго, як яе лодка перакулілася з-за шторму ў праліве на поўначы краіны.
У Берліне быў уведзены рэжым надзвычайнай сітуацыі. Ад урагану пацярпеў і горад Гамбург, цэнтр якога затапіла ў сувязі з моцнымі ападкамі.
У Польшчы ў сувязі з ураганам абвешчана 2-ы ўзровень небяспекі ў 10 ваяводствах.
Загінулі два чалавекі: яны знаходзіліся ў аўтамабілях. На аднаго з кіроўцаў ўпала дрэва, другі ўрэзаўся ў дрэва, якое ляжала на дарозе.
Акрамя таго, вецер пашкодзіў абсталяванне тэрмінала звадкаванага прыроднага газу у Свінауйсце на Балтыцы, адбылася невялікая ўцечка газу.
Ад урагану больш за ўсё пацярпелі Вялікапольскае, Паморскае, Заходне-Паморскае і Ніжнесілезскае ваяводствы.