«Гістарычны слоўнік беларускай мовы» выдадзены цалкам — агулам выйшла 37 тамоў
У НАН Беларусі адбылася прэзентацыя «Гістарычнага слоўніка беларускай мовы» ў 37 выпусках, створанага ў Інстытуце мовазнаўства імя Якуба Коласа НАН Беларусі, перадае карэспандэнт агенцтва «Мінск-навіны».
Фота Сяргея Пажогі
— Унікальнасць «Гістарычнага слоўніка беларускай мовы» ў тым, што гэта першы і адзіны даведнік, які з максімальнай паўнатой адлюстроўвае багацце слоўнікавага фонду беларускай мовы XIV—XVIII стагоддзяў, — падкрэсліў дырэктар Інстытута мовазнаўства імя Якуба Коласа НАН Беларусі Ігар Капылоў. — У ім атрымалі дэталёвую лексікаграфічную апрацоўку больш за 75 тысяч слоў, зафіксаваных у граматах, дамовах, статутах, летапісах, хроніках, хранографах, воінскіх і рыцарскіх раманах і аповесцях, мемуарных, публіцыстычных, навуковых і рэлігійных творах. «Гістарычны слоўнік беларускай мовы» — надзейная крыніца звестак пра мінулае Беларусі, ён ўтрымлівае найбагацейшую інфармацыю аб сацыяльна-эканамічным жыцці, матэрыяльнай і духоўнай культуры беларускага народа на працягу 500 гадоў.
— «Гістарычны слоўнік беларускай мовы» можна назваць сапраўдным праектам стагоддзя беларускай гуманітарнай навукі, — кажа загадчыца аддзела гісторыі беларускай мовы Цэнтра даследаванняў беларускай культуры, мовы і літаратуры НАН Беларусі Наталля Паляшчук. — Распрацоўка канцэпцыі гэтага ўнікальнага выдання, стварэнне яго базавай картатэкі, падрыхтоўка слоўнікавых артыкулаў вяліся з 60-х гадоў мінулага стагоддзя ў Інстытуце мовазнаўства імя Якуба Коласа НАН Беларусі пад кіраўніцтвам дактароў філалагічных навук, членаў-карэспандэнтаў НАН Беларусі Аркадзя Іосіфавіча Жураўскага і Аляксандра Мікалаевіча Булыкі.
Айчынныя лінгвісты стварылі шырокую картатэку, якая складаецца больш чым з 1 млн картак, якую таксама можна лічыць культурным і навуковым аб'ектам нацыянальнага значэння. «Гістарычны слоўнік беларускай мовы» разлічаны як на спецыялістаў (лінгвістаў, гісторыкаў, літаратуразнаўцаў), так і на ўсіх, хто цікавіцца мінулым сваёй краіны. З часам для большай даступнасці 37-томнага слоўніка яго аўтары плануюць распрацаваць электронную версію.
