У ноч на нядзелю амаль усе суседзі Беларусі пяройдуць на зімовы час
У ноч на нядзелю, 29 кастрычніка, краіны ЕС пераходзяць на зімовы час: стрэлкі перавядуць на гадзіну назад.
На зімовы час пераходзяць усе краіны Еўрапейскага саюза: для ўзгодненай працы ўнутранага рынку на ўсёй тэрыторыі ЕС дзейнічае адзіны дзень і час пачатку і канца летняга часу.
Пяройдзе на зімовы час і Украіна.
Вяртанне на летні час адбываецца ў апошнюю нядзелю сакавіка.
Беларусь, як і Расія, некалькі гадоў таму адмовілася ад пераводу стрэлак.
З 29 кастрычніка розніца ў часе паміж Мінскам і Вільняй (Рыгай, Кіевам, Талінам) складзе адну гадзіну, Мінскам і Варшавай (Амстэрдамам, Берлінам) — дзве гадзіны. Напрыклад, розніца ў часе паміж суседнімі Брэстам і Тэрэспалем цяпер будзе складаць дзве гадзіны.
Зменіцца расклад транспарту (цягнікоў і аўтобусаў), які накіроўваецца ў краіны ЕС і Украіну.
Напрыклад, цягнік Мінск — Вільня будзе адпраўляцца, як і раней са сталіцы Беларусі (8:00), але прыбываць у Літву на гадзіну раней па мясцовым часе (9:30). Адпраўленне з Вільні будзе на гадзіну раней (напр. 14:58), а прыбыццё ў Мінск, як і раней (18:45).
