У Польшчы мужчына з нажом напаў на наведвальнікаў гандлёвага цэнтра
У Сталёвай Волі ў Падкарпацкім ваяводстве Польшчы мужчына напаў з нажом на наведвальнікаў гандлёвага цэнтра. У выніку нападу загінула 50-гадовая жанчына, яшчэ дзевяць чалавек атрымалі раненні, паведамляе Радыё Польшча.
Інцыдэнт адбыўся каля 15.00 у пятніцу. Чалавек нападаў на людзей ззаду, наносячы ўдары ў спіну.
Некаторыя з наведвальнікаў аказалі супраціў і абясшкодзілі мужчыну, паваліўшы яго на падлогу. Нападніка ўтрымлівалі да прыбыцця паліцыі.
27-гадовы жыхар Сталёвай Волі затрыманы. Падчас нападу ён быў цвярозы, паліцыя праверыла яго на прадмет прысутнасці ў крыві наркатычных рэчываў.
Паведамляецца, што затрыманы раней да крымінальнай і адміністрацыйнай адказнасці не прыцягваўся.
За сітуацыяй сочыць прэм'ер-міністр Польшчы Беата Шыдла, якая адразу ж пасля нападу звязалася з мясцовымі ўладамі, а таксама міністрамі ўнутраных спраў і аховы здароўя з даручэннямі аператыўна высветліць акалічнасці злачынства і ўсяляк садзейнічаць пацярпелым.
