Прафесар, пісьменнік, прадзед: Вітаўтасу Ландсбергісу — 85 гадоў
Delfi.lt
Першаму кіраўніку адноўленай Літвы Вітаўтасу Ландсбергісу ў сераду споўнілася 85 гадоў.
Ён нарадзіўся ў 1932 г. у сям'і архітэктара Вітаўтаса Ландсбергіса-Жамкяльніса і доктара-акуліста Оны Ябланскіце-Ландсбергене, якой за ратаванне яўрэяў музеем Яд-Вашэм было прысвоена званне Праведніка свету.
У 1969 г. Вітаўтас Ландсбергіс абараніў кандыдацкую дысертацыю па мастацтвазнаўстве па музычнай творчасці Чурлёніса, з 1978 г. — прафесар Віленскай кансерваторыі, быў заслужаным дзеячам мастацтваў Літоўскай ССР, напісаў 150 кнігаў, некалькі пра Чурлёніса, некалькі зборнікаў вершаў. Ганаровы старшыня літоўскай Шахматнай федэрацыі.
З 1988 г. Вітаўтас Ландсбергіс узначаліў «Саюдзіс» (Дэмакратычны рух за перабудову ў Літве), быў абраны дэпутатам Вярхоўнага Савета СССР. 11 сакавіка 1990 г. пад яго кіраўніцтвам Вярхоўны Савет Літоўскай ССР прыняў Дэкларацыю аб аднаўленні незалежнасці, а сам Ландсбергіс быў абраны старшынёй ВС. У перыяд яго кіравання Літва здолела адбіцца ад эканамічнай блакады СССР. Таксама ўзначальваў Сейм Літвы ў 1996—2000 гг., быў дэпутатам Еўрапарламента.
Што праўда, сённяшні Сейм Літвы адмовіўся афіцыйна надаць Ландсбергісу статус першага кіраўніка дзяржавы (прэзідэнта).
«Прафесар з'яўляецца гiстарычнай асобай, сімвалам нашай незалежнасці і эпохі волі. Ён чалавек, якога ведае свет, і яго імя вядома ў свеце. Ён заўсёды быў і будзе першым кіраўніком дзяржавы. Ніхто — ні статусы, ні законы, ні усялякія махінацыі - ніколі не зменіць гістарычнага значэння гэтага чалавека для Літвы, і тое, што ён быў першым кіраўніком дзяржавы», - сказала сёння Даля Грыбаўскайце, віншуючы з 85-годдзем.
Сын Ландсбергіса таксама Вітаўтас — пісьменнік, дзеяч культуры, а ўнук Габрыэлюс з'яўляецца старшынёй партыі «Саюз Айчыны».
Сам Вітаўтас Ландсбергіс-старэйшы ў інтэрв'ю Delfi заявіў, што цяпер вельмі любіць бавіць час з праўнукамі, гуляе з імі ў шахматы, піша дзённікі ў вершах, а таксам рыхтуе да друку кнігу пра маці — доктара Ону Ябланскіце-Ландсбергене.