У Гродне трэцякласнік, які атрымаў у дзённік заўвагу, не вярнуўся дадому
Вечарам 17 кастрычніка дзевяцігадовы хлопчык не вярнуўся дадому са школы, паведамілі ў прэс-службе УУС Гродзенскага аблвыканкама. Бацькі забілі трывогу. Першапачаткова яны самастойна спрабавалі адшукаць сына, абследавалі прылеглую мясцовасць, аднак вынікаў гэта не дало. Пасля звароту ў міліцыю тэрмінова былі арганізаваныя пошукавыя мерапрыемствы.
«Да справы падключыліся спецыялісты крымінальнага вышуку. Яны паўторна абследавалі тэхналагічныя памяшканні дома, дзе жыло дзіця. Хлопчык мірна спаў на гарышчы», — паведамілі ў міліцыі. Хлопчык растлумачыў, што забыўся ключы ад кватэры, таму не змог трапіць унутр. У далейшым высветлілася, што хлопчык атрымаў у школьны дзённік заўвагу і пабаяўся прызнацца пра гэта бацькам.
У міліцыі яшчэ раз звярнулі ўвагу на тое, што з дзецьмі неабходна праводзіць гутаркі, распавядаць, як правільна паводзіць сябе ў той ці іншай сітуацыі.
